Almaniya məhkəməsi 2024-cü ildə Magdeburg şəhərində Milad yarmarkasında törədilən terror aktı ilə bağlı mühakimə olunan Səudiyyə Ərəbistanı vətəndaşı, 51 yaşlı Taleb əl-Əbdülmöhsən barəsində ömürlük həbs qərarı çıxarıb.
Elpress.az xəbər verir ki, “Bild” nəşrinin məlumatına görə, təqsirləndirilən şəxs qəsdən adam öldürmə, adam öldürməyə cəhd və sağlamlığa ağır zərər vurma maddələri üzrə günahkar bilinib.
Məhkəmə qərarı uzun sürən araşdırma və dinləmələrdən sonra elan olunub. Proses çərçivəsində məhkəmə-tibbi ekspertiza, psixiatriya və dilçilik sahələri üzrə mütəxəssislər də daxil olmaqla səkkiz ekspertin rəyi, həmçinin 109 şahidin ifadəsi dinlənilib.
Bildirilib ki, məhkəmə iclaslarında çoxsaylı zərərçəkmişlər və onların hüquqi nümayəndələri də iştirak ediblər. İstintaq materiallarının həcmi bir neçə min səhifədən ibarət olub.
İstintaq zamanı təqsirləndirilən şəxsə şəxsiyyət pozuntusu diaqnozu qoyulsa da, onun anlaqlı olduğu və cinayət məsuliyyəti daşıdığı müəyyən edilib.
Xatırladaq ki, terror aktı 20 dekabr 2024-cü ildə baş verib. BMW markalı avtomobilin Milad yarmarkasında insanların üzərinə sürülməsi nəticəsində 6 nəfər həyatını itirib, onlarla şəxs müxtəlif dərəcəli xəsarətlər alıb. Sonradan hücumun bir neçə həftə ərzində planlaşdırıldığı məlum olub.
