Nəriman Mehdixanlının 90 illik yubileyi: Şairin yaradıcılığına ehtiram göstərildi
Ağstafalı qocaman şair Nəriman Mehdixanlının 90 illik yubileyi münasibətilə tədbir keçirilib.Ağstafa Rayon İcra Hakimiyyətinin təşkilatçılığı ilə Ağstafa şəhərində yerləşən “Yazıçılar Evi”ndə baş tutan yubiley mərasimində rayon rəhbərliyi, hüquq-mühafizə orqanlarının nümayəndələri, yubilyarın yaxınları, sənət dostları və ictimaiyyət nümayəndələri iştirak ediblər.Tədbirdə çıxış edən Ağstafa Rayon İcra Hakimiyyətinin başçısı Seymur Orucov bildirib ki, yaradıcılığında əsasən vətənpərvərlik mövzusuna üstünlük verən Nəriman Mehdixanlının şeirləri oxucular tərəfindən sevilir və onun ədəbi irsi gələcək nəsillər üçün də dəyərli mənbə olaraq qalacaq.Yubiley gecəsində şairin həyat və yaradıcılığından geniş bəhs olunub, onun Azərbaycan ədəbiyyatına verdiyi töhfələr diqqətə çatdırılıb. Şair və yazıçılar tərəfindən yubilyarın əsərlərindən seçilmiş nümunələr səsləndirilib, aşıqlar isə onun sözlərinə bəstələnmiş saz havalarını ifa ediblər.Qeyd olunub ki, 2011-ci ildən Azərbaycan Yazıçılar Birliyinin üzvü olan Nəriman Mehdixanlının “Ürəklərdə iz salam”, “Bənövşə ömrü yaşayırıq”, “Ana təbiətdir ilham mənbəyim”, “Ellər, sözüm əmanət” və digər şeir kitabları oxuculara təqdim olunub.Sonda Nəriman Mehdixanlı mədəniyyət və sənət adamlarına göstərilən diqqətə görə təşəkkürünü bildirib. O, Ağstafa Rayon İcra Hakimiyyətinin Fəxri Fərmanı və hədiyyələri ilə təltif olunub.
