Laçın şəhərində Beynəlxalq Film Festivalının (Lachin International Film Festival – LIFF) açılışı olub.
Elpress.az xəbər verir ki, Mədəniyyət Nazirliyinin məlumatına əsasən, “Where Film Meets LIFE” şüarı ilə keçirilən festival avqustun 27-dək davam edəcək.Qarabağ və Şərqi Zəngəzurda ilk dəfə təşkil olunan beynəlxalq film festivalı regionun mədəni həyatında mühüm hadisə kimi diqqət çəkir.Festivalda nümayiş üçün 47 ölkədən 300-ə yaxın film təqdim edilib. Onlardan 38-i əsas proqrama seçilib. Tədbir çərçivəsində Azərbaycan kinosunun gənc nümayəndələrinin ərsəyə gətirdiyi 18 yerli film də tamaşaçılara təqdim olunacaq.Müsabiqənin 7 qalib filmi festivalın rəsmi mükafatı olan “Qızıl Palıd Budağı” ilə təltif ediləcək.Festivalın keçirilməsində əsas məqsədlər Azərbaycan kinematoqrafçılarının beynəlxalq kino mühiti ilə əlaqələrini genişləndirmək, müxtəlif ölkələrdən olan kino mütəxəssislərini bir araya gətirmək və yeni yaradıcı əməkdaşlıqlara şərait yaratmaqdır.
Təşkilatçılar həmçinin Laçının beynəlxalq kino və yaradıcı sənaye mərkəzlərindən birinə çevrilmək potensialını nümayiş etdirməyi hədəfləyirlər.
