AMEA A.A.Bakıxanov adına Tarix və Etnologiya İnstitutunda “Azərbaycan Demokratik Respublikası və Alaş-Orda: dövlət quruculuğunun tarixi təcrübəsi” mövzusunda beynəlxalq elmi konfrans keçirilib.
Elpress.az AZƏRTAC-a istinadən xəbər verir ki, tədbirdə Azərbaycan və Qazaxıstan arasında tarixi əlaqələr, milli dövlətçilik ənənələri və ortaq irsin araşdırılması məsələləri diqqət mərkəzində olub.Konfransın açılışında çıxış edən institutun elmi işlər üzrə direktor müavini İlqar Niftəliyev iki ölkə arasında elmi-humanitar əməkdaşlığın genişləndirilməsinin vacibliyini vurğulayıb. Çıxışlarda qeyd olunub ki, bu cür platformalar tarix elminin inkişafına və ortaq dəyərlərin öyrənilməsinə mühüm töhfə verir.Tədbirdə Azərbaycan Xalq Cümhuriyyəti və Alaş-Orda hökumətinin yaranması, parlamentarizmin formalaşması, siyasi liderlik, dövlətlərarası münasibətlər və Türküstan məsələsi ilə bağlı məruzələr təqdim edilib.Müzakirələr zamanı bildirilib ki, Azərbaycan Xalq Cümhuriyyəti və Alaş-Orda XX əsrin əvvəllərində türk xalqlarının milli dirçəliş və müstəqillik ideyalarının mühüm təcəssümü olub. Bu dövlətlərin tarixi təcrübəsi və siyasi irsi bu gün də elmi aktuallığını qoruyub saxlayır.Konfrans çərçivəsində tarixçilər milli dövlət quruculuğu, intellektual elitaların fəaliyyəti və tarixi irsin qorunması məsələləri ətrafında fikir mübadiləsi aparıblar. Vurğulanıb ki, ortaq keçmişin araşdırılması Azərbaycan və Qazaxıstan arasında elmi və humanitar əlaqələrin daha da möhkəmlənməsinə xidmət edir.
