Üzeyir Hacıbəylinin 141-ci ildönümü münasibətilə I Fəxri xiyabanda mərasim keçirilib
Elpress.az xəbər verir ki, Sentyabrın 18-də dahi bəstəkar, musiqişünas, pedaqoq və ictimai xadim Üzeyir Hacıbəylinin anadan olmasının 141-ci ildönümü tamam olur. Bu tarix eyni zamanda ölkədə Milli Musiqi Günü kimi qeyd edilir.Milli Musiqi Günü münasibətilə keçirilən tədbirlər ənənəvi olaraq I Fəxri xiyabanda Üzeyir Hacıbəylinin məzarının ziyarəti ilə başlayıb. Mərasimdə mədəniyyət naziri Adil Kərimli və tanınmış mədəniyyət xadimləri iştirak ediblər.İştirakçılar əvvəlcə Ümummilli lider Heydər Əliyevin və akademik Zərifə Əliyevanın məzarlarını ziyarət edərək onların xatirəsinə ehtiramlarını ifadə edib, məzarları üzərinə çiçəklər qoyublar. Daha sonra Üzeyir Hacıbəylinin məzarı önünə əklil qoyulub və gül dəstələri düzülüb.Mədəniyyət naziri Adil Kərimli Milli Musiqi Günü münasibətilə təbriklərini çatdırıb. O qeyd edib ki, 18 sentyabr 1995-ci ildə qəbul edilmiş sərəncam əsasında Milli Musiqi Günü kimi qeyd olunur və bu tarix Üzeyir Hacıbəylinin yaradıcılığına verilən yüksək qiymətin göstəricisidir.Nazir bildirib ki, sentyabrın 18-dən 30-dək Üzeyir Hacıbəyli XVIII Beynəlxalq Musiqi Festivalı keçiriləcək. Festival Heydər Əliyev Fondu və Mədəniyyət Nazirliyinin təşkilatçılığı ilə baş tutacaq və müxtəlif musiqi tədbirlərini əhatə edəcək.Bəstəkarlar İttifaqının sədri, Xalq artisti Firəngiz Əlizadə isə Üzeyir Hacıbəylinin Azərbaycan musiqi tarixində xüsusi rolunu vurğulayıb. Onun sözlərinə görə, bəstəkar Azərbaycan klassik musiqisinin əsasını qoyub, yeni musiqi janrlarının formalaşmasına böyük töhfə verib və milli musiqinin dünya səviyyəsində tanınmasına mühüm təsir göstərib.Mərasim çərçivəsində I Fəxri xiyabanda dəfn olunan görkəmli bəstəkar və sənətkarlar Qara Qarayev, Fikrət Əmirov, Bülbül, Rəşid Behbudov, Niyazi və Müslüm Maqomayevin məzarları da ziyarət olunub.
