Qobustanın arxeoloji və mədəni irsinin müasir elmi yanaşmalarla araşdırılması istiqamətində yeni əməkdaşlığa başlanılıb.
Elpress.az xəbər verir ki, Bakı Dövlət Universiteti ilə Qobustan Milli Tarix-Bədii Qoruğu arasında əməkdaşlıq haqqında anlaşma memorandumu imzalanıb.
Sənəd BDU-nun rektoru Elçin Babayev və Qobustan Milli Tarix-Bədii Qoruğunun direktoru Vüqar İsayev tərəfindən imzalanıb. Memorandum “Qobustanda arxeoloji sirlərin geofiziki üsullarla aşkarlanması” mövzusunda keçirilən beynəlxalq fənlərarası seminar çərçivəsində rəsmiləşdirilib.
Razılaşma Qobustan ərazisindəki arxeoloji abidələrin, qayaüstü təsvirlərin və digər mədəni irs nümunələrinin araşdırılması, sənədləşdirilməsi və rəqəmsal mühitə köçürülməsini nəzərdə tutur. Eyni zamanda irsin qorunması və təbliği üçün müasir elmi və texnoloji imkanlardan istifadə ediləcək.
Əməkdaşlıq çərçivəsində geofizika, arxeologiya, tarix, coğrafiya, geologiya, informasiya texnologiyaları, məsafədən zondlama, GIS və süni intellekt kimi müxtəlif istiqamətlərin imkanlarından birgə istifadə olunması planlaşdırılır. Tərəflər həmçinin ekspedisiyalar və sahə tədqiqatları təşkil edərək Qobustanın arxeoloji potensialını kompleks şəkildə öyrənəcəklər.
Memorandum BDU-nun tələbə, magistrant, doktorant və tədqiqatçılarının real arxeoloji mühitdə elmi-təcrübi fəaliyyətinə şərait yaradılmasını, həmçinin Qobustanın elmi imkanlarının yerli və beynəlxalq akademik mühitdə daha geniş tanıdılmasını da əhatə edir.
