Samir Dübəndi Cıdır düzündə təbii və tarixi landşaftın qorunmasının vacibliyini vurğulayıb
Elpress.az xəbər verir ki, Şuşanın, xüsusilə Cıdır düzünün tarixi, mədəni və təbii simasının qorunması ilə bağlı çağırış edilib.Azərbaycan Ekoturizm Assosiasiyasının sədri Samir Dübəndi bildirib ki, Cıdır düzü sıradan turizm məkanı deyil və bu ərazi Azərbaycan xalqının tarixi yaddaşı və milli kimliyi baxımından xüsusi əhəmiyyət daşıyır. Onun sözlərinə görə, qayaların, daşların və digər təbii səthlərin üzərinə ad, tarix və müxtəlif yazıların həkk olunması və ya boya ilə yazılması yolverilməzdir.Ekspert qeyd edib ki, şəhidlərin adlarının əbədiləşdirilməsi üçün xüsusi olaraq müəyyən edilmiş məkanlardan istifadə olunmalıdır. Cıdır düzünün isə memorial və ya qraffiti məkanına çevrilməməsi, ərazinin öz tarixi və təbii görünüşünün qorunması vacibdir.Samir Dübəndinin fikrincə, bu istiqamətdə ziyarətçi mədəniyyətinin formalaşdırılması mühüm rol oynayır. O, turistlərə səfərdən əvvəl davranış qaydalarının izah edilməsini, bələdçilərin məlumatlandırıcı fəaliyyətini, xəbərdarlıq nişanlarının və QR-kod vasitəsilə qaydaların təqdim olunmasını təklif edib.Ekspert həmçinin həssas ərazilərdə mütəmadi patrul və müşahidənin, zəruri hallarda videomüşahidənin və vahid monitorinq sisteminin tətbiqini vacib sayıb. O vurğulayıb ki, əsas məqsəd pozuntudan sonra cəza tətbiq etmək deyil, ziyarətçilərdə əvvəlcədən məsuliyyətli davranış formalaşdırmaqdır.Samir Dübəndi bildirib ki, Şuşaya səfər yalnız turizm deyil, həm də mədəni məsuliyyət daşıyır. Onun sözlərinə görə, turist sayının artması ilə yanaşı, təbiətə və mədəni irsə düşən yük də nəzərə alınmalı, “daha çox turist” yanaşması “daha məsuliyyətli turist” prinsipi ilə tamamlanmalıdır.
