AMEA Nəsimi adına Dilçilik İnstitutunun Türk dilləri şöbəsində yazıçı Rəna Abdullayeva ilə “Yazıçı və dil” mövzusunda elmi seminar keçirilmişdir.
Elpress.az-ın Azərtac.az-a istinadən verdiyi məlumata əsasən, Görüş zamanı Rəna Abdullayeva oxucularla fikir mübadiləsi apararaq yaradıcılığı barədə məlumat verib, ədəbi proseslə bağlı sualları cavablandırıb.Şöbə müdiri, professor İsmayıl Kazımov qonağın yaradıcılığı haqqında məlumat verərək onun müasir Azərbaycan ədəbiyyatına verdiyi töhfələrdən bəhs edib. O bildirib ki, yazıçının əsərlərində milli-mənəvi dəyərlər, insan ünsiyyəti və həyat həqiqətləri öz əksini tapır. Onun “Qisas”, “Yağışın yuyub apara bilmədiyi izlər”, “Qızılgül tikansız olmaz”, “Diqqət! İlk dayanacaq Şəhidlər xiyabanı, ilk görüş yeri ata məzarı” əsərlərində dil məsələləri xüsusi diqqət mərkəzində saxlanılır. Əsərlərdə istifadə olunan söz seçimi, ifadələrin poetikliyi və metaforik quruluş Azərbaycan dilinin zənginliyini nümayiş etdirir. Xüsusilə “Qızılgül tikansız olmaz” və “Yağışın yuyub apara bilmədiyi izlər” kimi adlar sadə, lakin dərin məna ilə seçilərək oxucunun emosional dünyasına təsir göstərir. Bu isə dilin həm bədii, həm də emosional funksiyasını ön plana çıxarır.Gənc dilçilər qeyd ediblər ki, yazıçının “İllər sonra” əsərində dil yalnız hadisələri çatdıran vasitə kimi deyil, həm də daxili aləmin ifadəçisi kimi çıxış edir. Personajların hissləri, düşüncələri və keçmişlə bağlı refleksiyaları dil vasitəsilə oxucuya ötürülür.Görüş zamanı ana dilinin saflığının qorunması, bədii ədəbiyyatın dil mədəniyyətinin inkişafındakı rolu və gənc nəslin mütaliəyə marağının artırılması məsələləri ətrafında fikir mübadiləsi aparılıb.
