Ermənistan baş nazirinin aparat rəhbəri Lilit Makuntsun son dövrlərdəki fəaliyyəti ölkənin yerli mediasında müzakirələrə səbəb olub.
Elpress.az xəbər verir ki, Ermənistanın “Hraparak” nəşri Makuntsun hökumətdəki fəaliyyəti və ictimai tədbirlərdə görünməsi ilə bağlı tənqidi material yayıb.
Nəşr iddia edir ki, yeni aparat rəhbəri sələfi Aravik Arutyunyandan fərqli olaraq daha fəal görünür və keçirdiyi görüşlər, iştirak etdiyi tədbirlər hökumətin rəsmi internet səhifəsində geniş şəkildə işıqlandırılır.
“Hraparak”ın yazdığına görə, rəsmi saytda Makuntsun fəaliyyəti ilə bağlı xəbərlərin çoxalması onda hökumətdə tutduğu vəzifədən daha geniş səlahiyyətlərə malik yüksək vəzifəli şəxs təsəvvürü yaradır.
Nəşr son günlər keçirilən “Ermənistan üçün yeni imkanlar: xarici siyasət, islahatlar və davamlılıq” mövzusunda iki günlük seminarı da nümunə göstərib. Bildirilir ki, tədbirdə diplomatik nümayəndəliklərin, beynəlxalq təşkilatların, analitik mərkəzlərin və ictimai qurumların nümayəndələri iştirak edib və tədbirin açılışında Lilit Makunts çıxış edib.
Materialda hökumətin rəsmi saytında Makuntsun tədbirdəki çıxışına və TRIPP layihəsi ilə bağlı fikirlərinə geniş yer verilməsi də diqqətə çatdırılıb.
“Hraparak” həmçinin Makuntsun Konstantin Petrosyana həsr olunmuş yubiley konsertində iştirakının da hökumətin rəsmi internet səhifəsində ayrıca xəbər kimi yayımlandığını qeyd edib.
