Azərbaycanın Avropa ilə Mərkəzi Asiya arasında rəqəmsal əlaqələrin gücləndirilməsində mühüm rol oynaya biləcəyi bildirilib.
Elpress.az Report-a istinadən xəbər verir ki, bunu Rəqəmsal Əməkdaşlıq Təşkilatının (DCO) baş katibi Dima Əl-Yahya deyib.
Onun sözlərinə görə, Azərbaycanın coğrafi mövqeyi ölkəyə Avropa, Qafqaz və Mərkəzi Asiya arasında rəqəmsal bağlantıların inkişafı baxımından əlavə imkanlar yaradır. Dima Əl-Yahya hesab edir ki, mövcud rəqəmsal dövlət idarəçiliyi və inkişaf edən telekommunikasiya infrastrukturu bu potensialın reallaşdırılmasına şərait yaradır.
DCO rəhbəri Azərbaycan və Qazaxıstan arasında çəkilişi tamamlanan Transxəzər Fiber-Optik Kabel xəttini də bu istiqamətdə mühüm layihələrdən biri kimi qeyd edib. 380 kilometrlik xəttin istifadəyə verilməsindən sonra Xəzər üzərindən yeni yüksək sürətli məlumat ötürmə marşrutunun formalaşacağı və ötürücülük qabiliyyətinin 400 Tbit/s-dən çox olacağı gözlənilir.
Dima Əl-Yahya vurğulayıb ki, Azərbaycanın əsas məqsədi coğrafi üstünlüyünü rəqəmsal imkanlara çevirmək və regionlar arasında yalnız infrastruktur deyil, həm də iqtisadiyyat, innovasiya və insan resursları baxımından əlaqələri genişləndirmək olmalıdır.
Onun sözlərinə görə, DCO bu prosesdə Azərbaycan üçün analitik və texniki dəstək, eləcə də beynəlxalq əlaqələrin qurulması istiqamətində imkanlar təqdim edə bilər.
