Azərbaycan-Türkiyə münasibətləri illər ərzində formalaşmış möhkəm siyasi, strateji və mənəvi bağlar üzərində inkişaf edir. İki ölkənin “Bir millət, iki dövlət” prinsipi əsasında qurulan əlaqələri müxtəlif sahələrdə əməkdaşlığın genişlənməsi ilə müşayiət olunur.
Elpress.az xəbər verir ki, son dövrlərdə sosial şəbəkələrdə Azərbaycanla Türkiyə arasında guya fikir ayrılığı və ya böhran yaşandığı barədə müxtəlif iddialar yayılır. Bu cür məlumatların iki ölkə arasında münasibətlərə dair yanlış təsəvvür yaratmağa xidmət etdiyi bildirilir.
Rəsmi açıqlamalar isə bunun əksini göstərir. Sentyabrın 1-də Bişkekdə Azərbaycan Prezidenti İlham Əliyevlə Türkiyə Prezidenti Rəcəb Tayyib Ərdoğanın görüşündə iki ölkə arasındakı münasibətlərin qardaşlıq və strateji müttəfiqlik üzərində qurulduğu vurğulanıb. Dövlət başçıları əlaqələrin bütün istiqamətlərdə daha da genişləndirilməsini və “Bir millət, iki dövlət” prinsipi əsasında qarşılıqlı dəstəyin davam etdirilməsini qeyd ediblər.
Sentyabr ayında Türkiyənin xarici işlər naziri Hakan Fidanın Bakıya səfəri zamanı da Azərbaycan-Türkiyə münasibətlərinin bütün sahələrdə uğurla inkişaf etdiyi bildirilib. Görüşlərdə enerji, nəqliyyat, iqtisadiyyat və regional məsələlər üzrə əməkdaşlığın genişləndirilməsi müzakirə olunub.
Beləliklə, sosial mediada yayılan ayrı-ayrı iddialardan asılı olmayaraq, iki ölkə arasında mövcud strateji müttəfiqlik münasibətləri qarşılıqlı siyasi iradə və yüksək səviyyəli əlaqələrlə davam edir.
