Gündəlik hasilat 1000 tona çatdı: Balaxanı neftçiləri ilk yarımili rekord göstəricilərlə başa vurdu
Elpress.az xəbər verir ki, SOCAR-la “Hasilat Pay Bölgüsü” sazişi çərçivəsində “Balaxanı-Sabunçu-Ramana” yatağında fəaliyyət göstərən “Balakhani Operating Company LTD” (BOC) 2026-cı ilin ilk altı ayını yüksək istehsal göstəriciləri ilə başa vuraraq rekord nəticəyə imza atıb.Şirkətin açıqladığı məlumata görə, bu dövrdə orta gündəlik neft hasilatı 1000 tona çatdırılıb. Eyni zamanda, qabaqcıl geoloji modelləşdirmə üsullarının və geoloji-texniki tədbirlərin uğurla tətbiqi sayəsində fəaliyyət göstərilən ərazilərdə işlənmədə olan quyuların sayı 820-yə qədər optimallaşdırılıb. Bu isə hasilatın daha səmərəli və dayanıqlı şəkildə həyata keçirilməsinə imkan yaradıb.Şirkətin prezidenti Rövşən Rzayev əldə olunan uğurlarla əlaqədar Balaxanı neftçilərinə təşəkkür məktubu ünvanlayaraq kollektivin peşəkarlığını, fədakarlığını və birgə əməyini yüksək qiymətləndirib. O bildirib ki, qazanılan rekord nəticələrin arxasında hər bir əməkdaşın zəhməti dayanır və məhz komanda ruhu bu uğurların əsas səbəblərindən biridir.Rövşən Rzayev vurğulayıb ki, gündəlik əməliyyatlarda dayanıqlı istehsal proseslərinin tətbiqi hasilatın artırılmasında mühüm rol oynayır. Onun sözlərinə görə, “Balakhani Operating Company LTD” bundan sonra da ekoloji təhlükəsizlik prinsiplərinə sadiq qalaraq neft hasilatını səmərəli, məsuliyyətli və müasir standartlara uyğun şəkildə davam etdirəcək.
