Çində yerləşən Üç Boğaz Bəndinin yaratdığı su anbarında toplanan nəhəng su kütləsinin Yerin fırlanmasına cüzi təsir göstərdiyi müəyyənləşdirilib. Söhbət planetin geofiziki göstəricilərində çox kiçik, lakin elmi baxımdan ölçülə bilən dəyişiklikdən gedir.
Elpress.az xəbər verir ki, NASA-nın geofiziki alimi Benjamin Çao və həmkarlarının apardığı hesablamalara əsasən, bəndin su anbarında toplanan təxminən 40 milyard kubmetr su kütləsinin Yer üzərində yenidən paylanması planetin fırlanma dinamikasına təsir göstərib.
Hesablamalarda bu dəyişiklik nəticəsində sutkanın uzunluğunun təxminən 0,06 mikrosaniyə artdığı göstərilir. Eyni zamanda, Yerin fırlanma oxunda təxminən 2 santimetr miqdarında dəyişiklik yarandığı qeyd olunur.
Bu təsirlər insan tərəfindən hiss ediləcək səviyyədə olmasa da, böyük həcmdə su kütləsinin Yer səthində paylanmasının planetin fırlanmasına təsir göstərə bildiyini nümayiş etdirir.
Üç Boğaz Bəndi dünyanın ən iri hidrotexniki qurğularından biri hesab olunur və Çinin Yantszı çayı üzərində yerləşir.
