Dövlət Statistika Komitəsində rəhbər vəzifələrdən birində dəyişiklik baş verib. Komitə sədrinin müavini Yusif Yusifov vəzifəsindən azad edilib.
Elpress.az xəbər verir ki, Prezident İlham Əliyevin imzaladığı digər sərəncamla Səbuhi Əliyev Dövlət Statistika Komitəsi sədrinin müavini təyin olunub.
1983-cü il təvəllüdlü Səbuhi Əliyev Azərbaycan Dövlət İqtisad Universitetində beynəlxalq iqtisadi münasibətlər ixtisası üzrə bakalavr və magistr təhsili alıb. O, 2004-2005-ci illərdə Silahlı Qüvvələrdə həqiqi hərbi xidmət keçib.
Yeni sədr müavini müxtəlif illərdə dövlət əmlakının idarə edilməsi, dövlət borcunun idarə olunması və maliyyə sahəsində çalışıb. O, Maliyyə Nazirliyi yanında Dövlət Borcunun və Maliyyə Öhdəliklərinin İdarə Edilməsi Agentliyində müxtəlif rəhbər vəzifələrdə, o cümlədən şöbə müdiri və direktor müavini kimi fəaliyyət göstərib.
Səbuhi Əliyev 2026-cı ilin aprelindən avqust ayınadək Dövlət Statistika Komitəsi sədrinin müşaviri, avqustun 24-dən oktyabrın 7-dək isə Komitənin Aparat rəhbəri vəzifəsində çalışıb.
O, dövlət qulluğunun baş müşaviridir. Səbuhi Əliyev Prezidentin 21 iyun 2025-ci il tarixli sərəncamı ilə “Dövlət qulluğunda fərqlənməyə görə” medalı ilə təltif olunub.
Səbuhi Əliyev ailəlidir, iki övladı var.
