Abşeron Rayon Mərkəzi Xəstəxanasında baş verən bıçaqlanma hadisəsinin iş münasibətləri zəminində meydana gəldiyi bildirilir. Hadisə nəticəsində tibb müəssisəsinin inzibati məsələlər üzrə direktor müavini Orxan Ənvərli xəsarət alıb.
Elpress.az xəbər verir ki, ilkin məlumatlara görə, hadisəni törətməkdə şübhəli bilinən şəxs xəstəxananın Dəstək xidmətləri şöbəsinin Texniki dəstək bölməsində sürücü işləyən Elçin Balayevdir. O, polis əməkdaşları tərəfindən saxlanılıb.
TƏBİB-in açıqlamasında sürücünün əmək intizamı qaydalarını pozması ilə bağlı əvvəllər bir neçə dəfə şifahi xəbərdarlıq aldığı bildirilib. Məsələ ilə bağlı yayılan əlavə məlumatlarda isə Balayevin direktor müavini ilə iş münasibətləri zəminində narazılıq yaşadığı qeyd olunur.
Mediada yayılan məlumatlara əsasən, hadisədən əvvəl tərəflər arasında gərginlik yaranıb. İddialara görə, sürücü bir müddət əvvəl Orxan Ənvərlinin otağına gələrək digər əməkdaşların yanında onu təhqir edib. Həmin vaxt onun işdən azad edilmədiyi bildirilir.
Hadisənin bu gün səhər saatlarında xəstəxananın ərazisində baş verdiyi, Orxan Ənvərli avtomobildən düşərkən ona bıçaqla hücum edildiyi barədə də məlumat yayılıb. Xəstəxananın mühafizəçilərinin müdaxiləsi nəticəsində daha bir zərbənin qarşısının alındığı bildirilir. Bu detalların istintaq tərəfindən rəsmən təsdiqlənməsi gözlənilir.
Xəsarət alan Orxan Ənvərliyə dərhal tibbi yardım göstərilib. TƏBİB onun vəziyyətinin hazırda stabil olduğunu açıqlayıb. Hadisə ilə bağlı aidiyyəti qurumlara məlumat verilib və araşdırma aparılır.
Qeyd edək ki, Orxan Ənvərli bundan əvvəl TƏBİB-in Daxili nəzarət və monitorinq departamentinin rəhbəri olub. O, 2026-cı ilin yayında həmin vəzifədən azad edilərək Abşeron Rayon Mərkəzi Xəstəxanasında direktorun inzibati məsələlər üzrə müavini təyin edilib.
