Əli Əsədov Dünya Bankının nümayəndə heyəti ilə görüşüb
Elpress.az xəbər verir ki, Baş nazir Əli Əsədov Dünya Bankının Cənubi Qafqaz üzrə regional direktoru Roland Praysın rəhbərlik etdiyi nümayəndə heyəti ilə görüş keçirib.Görüş zamanı Azərbaycan ilə Dünya Bankı arasında uzunmüddətli və səmərəli tərəfdaşlığın mövcud olduğu bildirilib. İndiyədək birgə həyata keçirilən layihələrin ölkənin sosial-iqtisadi inkişafına mühüm töhfələr verdiyi qeyd olunub.Tərəflər əməkdaşlığın müxtəlif istiqamətlər üzrə genişləndirilməsi imkanlarını da nəzərdən keçiriblər. Dayanıqlı şəhər inkişafı, yaşıl enerji, nəqliyyat infrastrukturu, kənd təsərrüfatı, su təchizatı və su ehtiyatlarının idarə olunması əsas əməkdaşlıq sahələri kimi diqqətə çatdırılıb.Görüşdə Azərbaycan və Dünya Bankı arasında qarşılıqlı faydalı tərəfdaşlığın inkişaf perspektivləri, həmçinin gələcəkdə həyata keçirilə biləcək birgə layihələr barədə fikir mübadiləsi aparılıb.Görüşdə Azərbaycan Mərkəzi Bankının sədri Taleh Kazımov da iştirak edib.
