Suriyadan Azərbaycana repatriasiya edilən daha 13 vətəndaşın ölkəyə qaytarıldıqdan sonra sosial reabilitasiyası həyata keçirilir.
Elpress.az xəbər verir ki, repatriasiya olunan şəxslər arasında altı qadın və yeddi uşaq olmaqla 13 nəfər Sosial Xidmətlər Agentliyinin müvafiq sosial xidmət müəssisəsinə yerləşdirilib.
Müəssisədə vətəndaşların ilkin tibbi müayinəsi aparılıb. Onların sosial və psixoloji vəziyyətinin qiymətləndirilməsi üçün də zəruri tədbirlər görülüb.
Hazırda repatriantların cəmiyyətə uyğunlaşması və sosial reabilitasiyası istiqamətində işlər davam etdirilir. Müvafiq mərhələ başa çatdıqdan sonra onların ailələrinə və evlərinə yola salınması nəzərdə tutulur.
Məlumata görə, son illərdə Azərbaycana repatriasiya edilən 630-dan çox şəxs Sosial Xidmətlər Agentliyinin sosial reabilitasiya xidmətlərindən yararlanıb. Hazırda isə 85 repatriantla bağlı reabilitasiya tədbirləri davam etdirilir.
