“Mən, Ennio Marrikone, öldüm…” – Milyonların qəlbində iz qoyan bəstəkarın təsirli həyat hekayəsi
Elpress.az-ın Kulis.az-a istinadən verdiyi məlumata əsasən, Dünya kino musiqisinin ən böyük simalarından biri hesab olunan görkəmli italyan bəstəkarı Ennio Marrikone təkcə bəstələri ilə deyil, həyatı və sənətə bağlılığı ilə də milyonlarla insanın yaddaşında silinməz iz qoyub. Onun adı yüzlərlə məşhur filmə bəstələdiyi musiqilər və bənzərsiz yaradıcılığı ilə dünya mədəniyyət tarixində xüsusi yer tutur.Ennio Marrikone 1928-ci il noyabrın 10-da İtaliyanın paytaxtı Romanın mərkəzində musiqi ilə nəfəs alan bir ailədə dünyaya gəlib. Atası Mario peşəkar truba ifaçısı idi və caz ilə opera orkestrlərində çıxış edirdi. Musiqiyə olan ilk marağı da məhz atasının ifa etdiyi melodiyalar oyadıb. O, hələ yeddi yaşında ilk bəstələrini yazmağa başlayır, kiçik yaşlarından gələcəyin böyük bəstəkarı olacağının siqnallarını verirdi.Marrikonenin qeyri-adi istedadı musiqi təhsili aldığı illərdə də özünü göstərib. Akademiyada müəllimləri onun bacarığına heyran qalır, o isə dörd il davam etməli olan harmoniya kursunu cəmi altı ay ərzində uğurla başa vuraraq fərqlənirdi.Lakin onun taleyini dəyişən əsas hadisə akademiyada deyil, məktəb illərində baş verib. Ennio Marrikone ibtidai sinifdə gələcəyin məşhur rejissoru Serco Leone ilə eyni partanı bölüşürdü. Uşaqlıq dostluğu illər sonra böyük yaradıcılıq əməkdaşlığına çevrildi. Onların birgə fəaliyyəti dünya kinosunda yeni dövrün başlanğıcı oldu və hər iki sənətkarın adı kino tarixinin ən parlaq simaları sırasında yer aldı.Ennio Marrikonenin yaratdığı əsərlər bu gün də dünyanın müxtəlif ölkələrində dinlənilir, onun musiqiləri isə kino sənətinin əbədi klassikaları kimi qiymətləndirilir. Onun zəngin irsi gələcək nəsillər üçün ilham mənbəyi olaraq yaşamaqda davam edir.
