“Böyük yeddilik” ölkələri qlobal enerji bazarında qiymət artımının və dalğalanmaların qarşısını almaq üçün əlavə neft ehtiyatlarının satışa çıxarılması barədə qərar qəbul edib.
Elpress.az xəbər verir ki, G7 liderlərinin keçirdiyi onlayn görüşün yekununda yayılan bəyanatda ümumilikdə 100 milyon barel neft və dizel yanacağının ehtiyatlardan bazara yönəldiləcəyi bildirilib.
Məlumata görə, proses Beynəlxalq Enerji Agentliyinin koordinasiyası ilə həyata keçiriləcək və ehtiyatların buraxılması dörd ay ərzində mərhələli şəkildə aparılacaq.
G7 ölkələri hesab edir ki, enerji daşıyıcılarının bahalaşması və bazardakı qeyri-sabitlik dünya iqtisadiyyatına, eləcə də əhalinin rifahına mənfi təsir göstərə bilər.
Xüsusilə dizel yanacağı bazarında yaranan təzyiqin azaldılması üçün ilk 20 gün ərzində əhəmiyyətli həcmdə ehtiyatın bazara çıxarılması nəzərdə tutulur. Həmçinin yüksək emal imkanlarına malik ölkələrlə əməkdaşlığın genişləndirilməsi planlaşdırılır.
Bəyanatda enerji məhsullarının ixracına yeni məhdudiyyətlərin tətbiq edilməməsinin vacibliyi vurğulanıb. G7 ölkələri digər neft istehsalçılarını da bazardakı vəziyyəti daha da gərginləşdirə biləcək addımlardan çəkinməyə çağırıb.
Beynəlxalq Enerji Agentliyi isə görülən tədbirlərin nəticələrini izləyəcək və ehtiyatların sonradan yenidən bərpa olunması da daxil olmaqla növbəti addımlar barədə hesabat hazırlayacaq.
