Azərbaycan Mərkəzi Bankı gələn ildən bank və ödəniş təşkilatlarında kart təhlükəsizliyi ilə bağlı məcburi beynəlxalq standartların tətbiqinə başlayacaq.
Elpress.az “Report”a istinadən xəbər verir ki, bu barədə AMB-nin İnformasiya təhlükəsizliyi, kibertəhlükəsizlik və rəqəmsal fırıldaqçılıqla mübarizə departamentinin direktoru Elnur Eyvazlı Bakıda keçirilən “Süni İntellekt Əsrində Maliyyə Kibertəhlükəsizliyinin Gələcəyi” adlı tədbirdə məlumat verib.Onun sözlərinə görə, Mərkəzi Bank ödəniş kartlarının təhlükəsizliyinə dair beynəlxalq PCI DSS standartının bütün banklar və ödəniş təşkilatları üçün tətbiqini planlaşdırır.Elnur Eyvazlı bildirib ki, gələn ildən etibarən bu standart üzrə sertifikatlaşdırma yalnız prosessinq mərkəzi olan banklar üçün deyil, prosessinq xidməti olmayan banklar üçün də hər il məcburi xarakter daşıyacaq. Eyni tələblərin ödəniş təşkilatlarına da şamil edilməsi nəzərdə tutulur.AMB rəsmisi qeyd edib ki, əsas məqsəd maliyyə sektorunda təhlükəsizlik səviyyəsini yüksəltmək və sistemin etibarlılığını daha da gücləndirməkdir.O, həmçinin məlumatların keyfiyyətinin artırılması istiqamətində işlərin davam etdiyini vurğulayıb. Bildirib ki, KYC və digər sistemlərə daxil edilən məlumatlarda uyğunsuzluq aşkar olunduqda, məlumatlar müvafiq platformalar vasitəsilə dəqiqləşdirilir və yanlış informasiya təqdim edən tərəfə dərhal bildiriş göndərilir. Bununla da maliyyə sektorunda məlumatların dəqiqliyinin və etibarlılığının təmin edilməsi hədəflənir.
