Deputat Azər Kərimli Azərbaycanın Orta Dəhlizdə strateji əhəmiyyətinin daha da artdığını bildirib.
Elpress.az xəbər verir ki, Milli Məclisin deputatı Azər Kərimli bildirib ki, qlobal logistika sistemində baş verən dəyişikliklər fonunda Trans-Xəzər Beynəlxalq Nəqliyyat Marşrutunun (Orta Dəhliz) əhəmiyyəti daha da artıb və Azərbaycan bu marşrutun aparıcı iştirakçılarından biri kimi mövqeyini möhkəmləndirir.
Onun sözlərinə görə, Bakı Beynəlxalq Dəniz Ticarət Limanı, Bakı–Tbilisi–Qars dəmir yolu, müasir avtomobil yolları, logistika mərkəzləri və rəqəmsal gömrük sistemi kimi infrastruktur layihələri Azərbaycanın regional logistika mərkəzinə çevrilməsində mühüm rol oynayıb.
Deputat qeyd edib ki, Orta Dəhliz təkcə iqtisadi deyil, həm də geosiyasi baxımdan strateji əhəmiyyət daşıyır. Azərbaycanın həyata keçirdiyi nəqliyyat siyasəti, beynəlxalq əməkdaşlığın genişləndirilməsi və logistika imkanlarının inkişafı ölkənin Avrasiya məkanında rolunu daha da gücləndirir.
