Bakının Binəqədi rayonunun Aşağı Sulutəpə qəsəbəsində yağışdan sonra yaranan mənzərə sakinlərin gediş-gəlişini çətinləşdirib.
Elpress.az xəbər verir ki, Pənahabad küçəsi 1 ünvanında, “Nur” şadlıq sarayından aşağı istiqamətdə yerləşən yol su altında qalıb. Küçədə yaranan gölməçə və palçıq səbəbindən həm piyadaların, həm də nəqliyyat vasitələrinin hərəkəti çətinləşib.
Sakinlərin sözlərinə görə, xüsusilə işə gedib-gələn insanlar üçün vəziyyət ciddi narahatlıq yaradıb. Küçədən keçmək üçün alternativ yolun olmaması gediş-gəlişi daha da çətinləşdirir.
Qeyd edək ki, Sulutəpənin Pənahabad küçəsində yağışdan sonra oxşar problemin daha əvvəl də yaşandığı barədə məlumatlar yayılıb.
Sakinlər problemin aidiyyəti qurumlar tərəfindən nəzərə alınaraq küçədə yaranmış vəziyyətin aradan qaldırılmasını istəyirlər.
