Saatlı Rayon Polis Şöbəsinin Dövlət Yol Polisi Bölməsinin həyata keçirdiyi nəzarət və profilaktik tədbirlər nəticəsində toy karvanı zamanı yol hərəkəti qaydalarını kobud şəkildə pozaraq avtoxuliqanlıq hərəkətləri edən “Tofas” və “Mercedes” markalı avtomobillərin sürücüləri — Hüseyn Tağızadə və Zamin Mehdiyev saxlanılıblar. Aparılan araşdırmalar zamanı həmin şəxslərin ictimai qaydanı pozaraq digər hərəkət iştirakçıları üçün təhlükəli vəziyyət yaratdıqları müəyyən edilib və onlar barəsində qanunvericiliyə uyğun tədbirlər görülüb.
Elpress.az-ın Qafqazinfo.az-a istinadən verdiyi məlumata əsasən, Araşdırmalar zamanı H.Tağızadənin nəqliyyat vasitəsini idarə edərkən sürücülük hüququ olmadan sükan arxasında olduğu, eyni zamanda onun sərxoş vəziyyətdə hərəkət etdiyi də müəyyən edilib. Hadisə ilə bağlı hər iki sürücü barəsində inzibati xəta protokolları tərtib olunaraq materiallar aidiyyəti üzrə məhkəməyə təqdim edilib.Məhkəmənin çıxardığı qərara əsasən, Hüseyn Tağızadə inzibati qaydada həbs cəzasına məhkum edilib, Zamin Mehdiyev barəsində isə sürücülük hüququnun 1 il müddətinə məhdudlaşdırılması barədə qərar qəbul olunub.
