İntensiv yağışlar səbəbindən iri şəhərlərin su təchizatı və yağış sularının idarə olunması istiqamətində işlər gücləndirilib. Aidiyyəti qurumlar həssas ərazilərdə fasiləsiz xidmət göstərirlər.
Elpress.az xəbər verir ki, Azərbaycan Dövlət Su Ehtiyatları Agentliyinin İri Şəhərlərin Su Təchizatı Departamenti yağıntılarla əlaqədar gücləndirilmiş iş rejiminə keçib.
Məlumata görə, xüsusilə payız-qış mövsümündə tullantı və yağış suları şəbəkələrinin mütəmadi təmizlənməsi güclü yağıntılar zamanı suyun ətraf ərazilərdə toplanmasının qarşısının alınmasına kömək edir.
Proqnozlara əsasən, sukanal idarələrinin əməkdaşları həssas nöqtələrdə, o cümlədən körpülərin altında, küçə və prospektlərdə, eləcə də qəsəbədaxili ərazilərdə növbəli xidmət aparırlar.
Yağış sularının çəkilməsi, xətlərin açılması və suların mövcud şəbəkələrə yönləndirilməsi ilə bağlı işlər görülür. Bu məqsədlə müxtəlif təyinatlı texnikalar da ərazilərə cəlb olunub.
