Ekologiya və Təbii Sərvətlər Nazirliyinin iki vəzifəli şəxsi meşə ərazilərində torpaq sahələrinin icarəyə verilməsi müqabilində rüşvət almaqda ittiham olunur.
Elpress.az xəbər verir ki, Baş Prokurorluğun məlumatına əsasən, nazirlikdən daxil olmuş müraciət əsasında Baş prokuror yanında Korrupsiyaya qarşı Mübarizə Baş İdarəsində araşdırma aparılıb və cinayət işi başlanıb.
İstintaqla müəyyən edilib ki, 2025–2026-cı illərdə Meşələrin İnkişafı Xidmətinin 7 saylı Regional Meşə Təsərrüfatı Mərkəzinin direktoru vəzifəsində çalışmış Fizuli Məmmədov meşəbəyi Vidadi Əsgərovla qabaqcadan əlbir olaraq meşə ərazilərindəki torpaq sahələrinin icarəyə verilməsi üçün müxtəlif məbləğlərdə pul alıb.
Toplanmış sübutlar əsasında hər iki şəxsə Cinayət Məcəlləsinin 311.3.1, 311.3.2 və 311.3.3-cü maddələri ilə ittiham irəli sürülüb. Məhkəmənin qərarı ilə Fizuli Məmmədov barəsində həbs qətimkan tədbiri seçilib. Vidadi Əsgərov isə ev dustaqlığına buraxılıb və vəzifəsindən kənarlaşdırılıb.
Hazırda cinayət işi üzrə istintaq və əməliyyat-axtarış tədbirləri davam etdirilir. Qanunsuz əməllərin tam dairəsinin müəyyənləşdirilməsi və hadisədə iştirak etmiş digər şəxslərin məsuliyyətə cəlb olunması istiqamətində araşdırmalar aparılır.
