Elpress.az xəbər verir ki, Qəbələ rayonunda yağan intensiv leysan yağışları ciddi fəsadlara səbəb olub. Günorta saatlarından başlayan yağıntılardan sonra rayonun Vəndam qəsəbəsində yerləşən Qara çayda suyun səviyyəsi yüksələrək selə çevrilib.
Sel suları qəsəbənin bir sıra ərazilərinə, o cümlədən yaşayış evlərinin həyətlərinə dolub. Həmçinin kəndin mərkəzində çay sahilində yerləşən məscidin həyəti, bağ sahələri və digər ərazilər selin gətirdiyi lil və palçıqla örtülüb.
Təbii hadisə nəticəsində yeni inşa edilən avtomobil yolunun bir hissəsi də ciddi zərər görərək yararsız vəziyyətə düşüb. Güclü yağış və palçıq kütləsi nəqliyyatın hərəkətində çətinliklər yaradıb.
Hazırda ərazidə selin yaratdığı fəsadların aradan qaldırılması, yolların və həyətlərin təmizlənməsi istiqamətində müvafiq qurumlar tərəfindən işlər aparılır. Hadisə nəticəsində xəsarət alanlar barədə məlumat verilməyib.
