Bakının Nizami rayonunda açıq sahədə baş vermiş yanğın Fövqəladə Hallar Nazirliyinin əməkdaşlarının operativ müdaxiləsi nəticəsində qısa müddətdə nəzarətə götürülərək söndürülüb.
Elpress.az xəbər verir ki, Bakının Nizami rayonunda açıq ərazidə baş vermiş yanğın operativ şəkildə söndürülüb. Fövqəladə Hallar Nazirliyinin (FHN) yaydığı məlumata görə, hadisə ilə bağlı məlumat nazirliyin “112” qaynar telefon xəttinə daxil olub.Bildirilib ki, yanğın Babək prospekti ərazisində yerləşən açıq sahədə qeydə alınıb. Məlumat daxil olan kimi FHN-in Dövlət Yanğından Mühafizə Xidmətinin yanğınsöndürən briqadaları hadisə yerinə cəlb olunub.Yanğınsöndürənlərin çevik və koordinasiyalı müdaxiləsi nəticəsində alovun geniş əraziyə yayılmasının qarşısı alınıb və yanğın qısa müddətdə tam söndürülüb.Hadisə nəticəsində təxminən 2 hektar ərazidə kol-kos və taxta tullantıları yanıb. Ətraf ərazilər, o cümlədən ağaclıq sahə yanğından mühafizə olunub və daha böyük fəsadların qarşısı alınıb.Qeyd edək ki, ilkin məlumatlarda Nizami rayonu ərazisində quru otluq sahədə yanğın baş verdiyi, əraziyə FHN-in Dövlət Yanğından Mühafizə Xidmətinin qüvvələrinin cəlb olunduğu bildirilmişdi. Son məlumata əsasən, yanğın tam söndürülüb.
