Məhkəmə qərarlarını dəyişdirmək vədi ilə vətəndaşları aldadan şəxslər uzunmüddətli həbs cəzası alıblar
Elpress.az xəbər verir ki, Məhkəmə qərarlarına təsir göstərmək və müxtəlif vədlərlə vətəndaşlardan külli miqdarda pul almaqda təqsirləndirilən 4 şəxsin cinayət işi üzrə məhkəmə prosesi başa çatıb.Şəki Ağır Cinayətlər Məhkəməsində keçirilən prosesdə Rəsul Abbasov, Fəqan Həsənov, Zamin İbrahov və Bəhruz Hacıyev barəsində hökm elan olunub.Məhkəmənin qərarı ilə Rəsul Abbasov, Fəqan Həsənov və Zamin İbrahovun hər biri 7 il, Bəhruz Hacıyevin isə 5 il müddətinə azadlıqdan məhrum edilməsi müəyyənləşdirilib.Təqsirləndirilən şəxslər Cinayət Məcəlləsinin 178.3.2-ci maddəsi ilə, yəni külli miqdarda ziyan vurmaqla dələduzluq etməkdə ittiham olunublar.İttihama əsasən, onlar Ədliyyə Nazirliyi, Konstitusiya Məhkəməsi, Ali Məhkəmə və Bakı Apellyasiya Məhkəməsində yüksək vəzifələrdə çalışan qohum və tanışlarının olduğunu bildirərək müxtəlif şəxslərdən pul alıblar.Təqsirləndirilən şəxslər həbsdə olan şəxslərin cinayət məsuliyyətindən azad edilməsinə, bu mümkün olmadıqda isə onların daha yüngül cəza almasına kömək göstərə biləcəklərini vəd ediblər.Bu vədlərdən istifadə etməklə ayrı-ayrı şəxslərdən ümumilikdə 100 min manat pul ələ keçirildiyi bildirilir.Məlumata görə, zərərçəkmişlərdən yalnız birinə dəymiş ziyanın 6 min manatı ödənilib. Digər zərərçəkmişlərə isə hər hansı ödəniş edilməyib.
