Qarabağ və Şərqi Zəngəzurun təbii sərvətlərinin qorunması və ekosistemlərin bərpası istiqamətində yeni addım atılıb. Prezident İlham Əliyev Qarabağ Milli Parkının yaradılması haqqında Sərəncam imzalayıb.
Elpress.az xəbər verir ki, sənədə əsasən, milli park Ağdərə, Xocalı, Kəlbəcər, Şuşa və Laçın rayonlarının dövlət mülkiyyətində olan torpaq sahələri hesabına yaradılıb. Ümumilikdə 88 418 hektar ərazi xüsusi mühafizə olunan təbiət ərazilərinin torpaqları kateqoriyasına daxil edilib.
Park üçün ayrılan torpaqların bölgüsü belədir:
- Ağdərə rayonu – 44 773,79 hektar;
- Xocalı rayonu – 24 597,80 hektar;
- Kəlbəcər rayonu – 13 514,98 hektar;
- Şuşa rayonu – 5 314,34 hektar;
- Laçın rayonu – 217,09 hektar.
Sərəncamda qeyd olunur ki, işğal dövründə bölgənin bioloji müxtəlifliyinə ciddi ziyan dəyib, nadir bitki və heyvan növləri məhv edilib, nəticədə ekoloji tarazlıq pozulub.
İşğaldan azad edilmiş ərazilərdə təbii ekosistemlərin və biomüxtəlifliyin bərpası, xüsusi mühafizə olunan təbiət ərazilərinin fəaliyyətinin yenidən qurulması, eləcə də regionun “yaşıl artım” zonasına çevrilməsi istiqamətində tədbirlər görülür.
Sənədə əsasən, Nazirlər Kabinetinə Sərəncamdan irəli gələn məsələlərin həlli tapşırılıb.
