Bakı metrosunun inkişafında yeni mərhələ: yeni stansiyalarda liftlər, eskalatorlar və müasir infrastruktur tətbiq ediləcək
Elpress.az-ın Axar.az-a istinadən verdiyi məlumata əsasən, bakı Metropolitenində yeni stansiyaların tikintisi çərçivəsində sərnişinlər üçün daha rahat və müasir şəraitin yaradılması nəzərdə tutulur.2030-cu ilə qədər Bakı metrosunda 10 yeni stansiyanın inşasının planlaşdırıldığı bildirilib. Onlardan birinin – şərti olaraq “B-04” adlandırılan və keçmiş “Semaşko” xəstəxanasının arxasında yerləşən stansiyanın tikintisinə artıq başlanılıb.Bu barədə Bakı Metropoliteni QSC-nin mətbuat katibi Bəxtiyar Məmmədov “Yol hərəkəti təhlükəsizliyi: hüquq və vəzifələr” və “Müasir şəhərsalmada piyada təhlükəsizliyi” layihələri çərçivəsində keçirilən ictimai müzakirə zamanı məlumat verib.Onun sözlərinə görə, yeni stansiyada müasir standartlara uyğun texniki həllər tətbiq ediləcək. Sərnişinlərin rahat hərəkətini təmin etmək məqsədilə səviyyələrarası keçidlərdə eskalatorlar, liftlər və xüsusi təyinatlı pilləkənlər quraşdırılacaq.Bəxtiyar Məmmədov qeyd edib ki, hazırda daha 9 yeni stansiyanın layihələndirilməsi istiqamətində işlər davam etdirilir. Layihələr hazırlanarkən beynəlxalq standartlar, xarici ekspertlərin yanaşmaları və mövcud yerli normalar nəzərə alınır.Bildirilib ki, gələn ildən etibarən beş stansiyanın bənövşəyi xətt, dörd stansiyanın isə yaşıl xətt üzrə tikintisinə başlanılması planlaşdırılır. Yeni layihələrin əsas məqsədi metro infrastrukturunun genişləndirilməsi və sərnişinlər üçün daha təhlükəsiz, əlçatan və komfortlu nəqliyyat mühitinin yaradılmasıdır.
