Elpress.az xəbər verir ki, Bakıda təcili tibbi yardım xidmətinin operativliyinin artırılması məqsədilə yeni layihəyə start verilib.
Layihə çərçivəsində təcili tibbi yardım briqadalarının fəaliyyətində xüsusi təchiz olunmuş motosikletlərdən istifadə ediləcək. Dünyanın bir sıra ölkələrində uğurla tətbiq olunan bu model paytaxtda da çağırış ünvanına daha qısa müddətdə çatmağa imkan verəcək.
Yeni sistemə əsasən, motosikletlə hərəkət edən tibb işçisi ambulans hadisə yerinə çatana qədər xəstəyə ilkin tibbi yardım göstərəcək və zərurət yarandıqda həyati vacib müdaxilələr həyata keçirəcək.
Məlumata görə, xidmətə cəlb ediləcək motosikletlər avtomatik xarici defibrilyator, oksigen balonu, travma çantası, reanimasiya avadanlıqları və təcili tibbi yardım üçün zəruri dərman preparatları ilə təchiz olunacaq.
Qeyd edək ki, yeni xidmət modeli xüsusilə paytaxtda nəqliyyat sıxlığının müşahidə olunduğu saatlarda təcili tibbi yardımın operativliyinin artırılmasına xidmət edəcək.
