Azərbaycan Respublikasının Daxili İşlər Nazirliyində 2026-cı ilin ilk altı ayının əməliyyat-xidməti fəaliyyətinin nəticələrinə həsr olunmuş Kollegiya iclası keçirilib.
Elpress.az xəbər verir ki, Kollegiya iclasına daxili işlər naziri, general-polkovnik Vilayət Eyvazov sədrlik edib. Nazir çıxışında daxili işlər orqanlarının və Daxili Qoşunların cinayətkarlıqla mübarizə, ictimai asayişin qorunması, insan hüquq və azadlıqlarının müdafiəsi istiqamətində üzərlərinə düşən vəzifələri uğurla yerinə yetirdiyini bildirib. O, beynəlxalq və respublika əhəmiyyətli tədbirlərdə, eləcə də işğaldan azad olunmuş ərazilərdə təhlükəsizliyin etibarlı şəkildə təmin edildiyini vurğulayıb.İclasda təqdim olunan hesabatda bildirilib ki, 2026-cı ilin ilk altı ayında ölkə üzrə 15 420 cinayət qeydə alınıb və onların 95,4 faizi daxili işlər və prokurorluq orqanları tərəfindən araşdırılıb. Ötən ilin eyni dövrü ilə müqayisədə ümumi cinayətlərin, ağır və xüsusilə ağır cinayətlərin, oğurluq, dələduzluq, quldurluq, xuliqanlıq, ailə münaqişəsi zəminində törədilən cinayətlərin, eləcə də yol-nəqliyyat hadisələrinin və bu qəzalarda ölənlərin sayında azalma qeydə alınıb. Eyni zamanda, cinayətlərin açılması göstəricilərində də artım müşahidə olunub.Hesabat dövründə həyata keçirilən əməliyyat-axtarış tədbirləri nəticəsində 3 013 cinayət açılıb, 4 474 hüquqazidd əməlin qarşısı alınıb, 6 887 nəfər cinayət məsuliyyətinə cəlb edilib. Bundan başqa, 4 ton 318 kiloqram narkotik vasitə qanunsuz dövriyyədən çıxarılıb, 3 088 ədəd odlu silah, 337 qumbara və 99 mindən çox patron aşkar olunub. İclasın sonunda Vilayət Eyvazov hüquq qaydasının möhkəmləndirilməsi, cinayətlərin qarşısının alınması, vətəndaş müraciətlərinə daha həssas yanaşılması və vətəndaş məmnunluğunun təmin edilməsi istiqamətində aidiyyəti qurumlara müvafiq tapşırıqlar verib.
