Avtomobili və xalçanı həyətdə yuyanlar hansı halda cərimələnə bilər?
Elpress.az xəbər verir ki, Çoxmənzilli binaların həyətlərində avtomobil və xalça yuyulması ilə bağlı məsuliyyət məsələsi gündəmə gəlib.Qanunvericilikdə avtomobil və ya xalçanın həyətdə yuyulmasını birbaşa qadağan edən ayrıca norma nəzərdə tutulmasa da, bu proses zamanı yaranan çirkab sularının ətrafa axıdılması hüquqi məsuliyyət yarada bilər.Avtomobil yuyularkən suya yuyucu vasitələrlə yanaşı, yağ, yanacaq qalıqları, təkər və əyləc hissəcikləri kimi çirkləndiricilər qarışa bilər. Xalçaların yuyulması zamanı isə yuyucu maddələr və müxtəlif çirkabların torpağa axması mümkündür.Lakin belə hallarda cərimənin tətbiqi avtomatik xarakter daşımır. Məsuliyyətin yaranması üçün torpağın tullantı, kimyəvi maddə və ya çirkab suları ilə faktiki çirkləndirildiyi müəyyən edilməlidir.İnzibati Xətalar Məcəlləsinə əsasən, torpağın bu şəkildə çirkləndirilməsinə görə fiziki şəxslər 500-800 manat, vəzifəli şəxslər 2 000-2 500 manat, hüquqi şəxslər isə 7 500-10 000 manat məbləğində cərimələnə bilər.
