Vətən müharibəsində döyüş yoldaşlarını xilas etmək istəyərkən şəhid olan İsmayıl Kərimlinin həyat hekayəsi ekranlaşdırılıb.
Elpress.az xəbər verir ki, qəhrəman şəhidin xatirəsinə həsr olunan “İsmayıl məqamı” sənədli filminin təqdimat mərasimi keçirilib.
Filmin ssenari müəllifi və quruluşçu rejissoru Səməd Mehriban Ağayevdir. Təqdimatda iştirak edən Milli Məclisin deputatları Azay Quliyev və Məlahət İbrahimqızı ekran əsərinin əhəmiyyətindən danışaraq şəhidlərin xatirəsinin yaşadılmasının vacibliyini vurğulayıblar.
Azay Quliyev çıxışında bildirib ki, İsmayıl Kərimli və Vətən uğrunda canından keçən digər qəhrəmanlar xalqın yaddaşında daim yaşayacaqlar. Məlahət İbrahimqızı isə filmin yalnız bir şəhidin deyil, bütün şəhidlərin xatirəsinə ehtiram nümunəsi kimi dəyərləndirilə biləcəyini qeyd edib.
Ekran əsərinin yaradıcı heyətində baş prodüser Ceyhun Kərimov, quruluşçu operator Toğrul Qəhrəmanlı, montaj rejissoru Mirvüqar Abdulov və bəstəkar Vüqar Məmmədzadə yer alıblar.
İsmayıl Kərimli 10 oktyabr 1997-ci ildə Bakıda anadan olub. O, 2020-ci il Vətən müharibəsi zamanı noyabrın 4-də Daşaltı istiqamətində döyüş yoldaşlarını xilas etməyə çalışarkən ağır yaralanaraq şəhid olub.
