Xırdalan gündəlik ünvanlara qısa müddətdə çatmaq imkanına görə ölkənin digər üç şəhərindən öndə qərarlaşıb.
Elpress.az xəbər verir ki, Friendly City Index (FCI) çərçivəsində aparılan araşdırmada Bakı, Sumqayıt, Xırdalan və Gəncənin gündəlik nəqliyyat əlçatanlığı qiymətləndirilib.
Sorğunun nəticələrinə əsasən, Xırdalanda respondentlərin 27 faizi gündəlik getdikləri ünvanlara 15 dəqiqə ərzində çata bildiyini bildirib. Bakıda bu göstərici 14 faiz, Sumqayıt və Gəncədə isə 13 faiz olub.
Araşdırmada istifadə olunan “15 dəqiqəlik şəhər” konsepsiyası sakinlərin iş, təhsil, alış-veriş, səhiyyə və istirahət kimi gündəlik ehtiyaclarını yaşadıqları əraziyə yaxın məsafədə qarşılaya bilməsini nəzərdə tutur. Məqsəd uzunmüddətli səfərləri azaltmaq və şəhər həyatını daha əlçatan etməkdir.
Azərbaycan üzrə ümumi nəticələrə görə, iştirakçıların 40 faizi gündəlik səfərlərinə təxminən 30 dəqiqə sərf etdiyini qeyd edib. Respondentlərin 14,6 faizi 15 dəqiqəlik məsafədə olduqlarını, təxminən hər on nəfərdən biri isə yolda 45-60 dəqiqə keçirdiyini bildirib.
Beynəlxalq müqayisədə Xorvatiyanın Pula və Latviyanın Ogre şəhərləri 60 faizlik nəticə ilə ilk sırada yer alıb. Estoniyanın Kohtla-Yarve şəhərində isə bu göstərici 56 faiz təşkil edib.
Sorğuda yaş və məşğulluq vəziyyətinə görə də fərqlər müəyyənləşib. 18-24 yaşlı iştirakçıların hər beş nəfərindən biri gündəlik ünvanlarına 15 dəqiqə ərzində çatdığını bildirib.
Bolt-un Azərbaycandakı ictimaiyyətlə əlaqələr üzrə meneceri Nigar Kazımova qeyd edib ki, indeksin reytinqləri sakinlərin eyni suallara verdiyi cavablar əsasında formalaşdırılır. Onun sözlərinə görə, layihənin əsas məqsədi şəhər sakinlərinin təcrübəsini daha geniş auditoriyaya çatdırmaqdır.
Qeyd edək ki, Friendly City Index araşdırması 2025-ci ildə 9 ölkənin 54 şəhərini əhatə edib. 2026-cı ildə isə coğrafiyası 11 ölkə və 62 şəhərə qədər genişləndirilib. Azərbaycan şəhərləri layihəyə ilk dəfə bu il daxil edilib.
