Şirvanda fövqəladə hallar zamanı əhalinin təxliyəsi və təhlükəsizliyi müzakirə olunub
Elpress.az xəbər verir ki, Fövqəladə Hallar Nazirliyinin (FHN) Muğan Regional Mərkəzi tərəfindən Şirvan Şəhər İcra Hakimiyyətində fövqəladə hallara hazırlıq və bu hallar zamanı əhalinin təhlükəsizliyinin təmin edilməsi ilə bağlı seminar-müşavirə təşkil olunub.Tədbirdə fövqəladə halların əvvəlcədən proqnozlaşdırılması, mümkün risklərin qiymətləndirilməsi, təhlükəli ərazilərdən əhalinin köçürülməsinin təşkili, həmçinin maddi və mədəni sərvətlərin qorunması məsələləri diqqət mərkəzində saxlanılıb.Seminarda FHN-in Muğan Regional Mərkəzinin və bölgədə fəaliyyət göstərən digər qurumların əməkdaşları, Şirvan Şəhər İcra Hakimiyyətinin məsul şəxsləri, Fövqəladə Hallar Komissiyasının üzvləri, inzibati ərazi dairələrinin nümayəndələri, bələdiyyələr, idarə və təşkilatların təmsilçiləri iştirak ediblər.Şəhər İcra Hakimiyyəti başçısının müavini Aynur Fərzəliyeva çıxışında müzakirə olunan məsələlərin əhəmiyyətini vurğulayıb. O, FHN-in regional mərkəzi ilə şəhərdəki aidiyyəti qurumlar arasında qarşılıqlı fəaliyyət planlarının nəzərdən keçirildiyini bildirib.Muğan Regional Mərkəzinin rəis müavini, polkovnik-leytenant Orxan Bağırov isə fövqəladə halların qarşısının alınması və nəticələrinin aradan qaldırılması zamanı qurumlararası əməkdaşlığın vacibliyindən danışıb. Görüşdə mövcud vəziyyət, görülən işlər, qarşıya çıxan problemlər və onların həlli istiqamətləri də müzakirə edilib.Tədbir zamanı regional mərkəzin əməkdaşları tərəfindən müxtəlif vaxtlarda aparılmış monitorinqlərin nəticələrini əks etdirən fotoslaydlar nümayiş etdirilib. Sonda iştirakçıların təklifləri dinlənilib və onları maraqlandıran suallar cavablandırılıb.
