Mayın 15-i dünyada Beynəlxalq İqlim Günü kimi qeyd edilir.
Elpress.az-ın Azərtac-a istanadən verdiyi məlumata əsasən, bu qeyri-rəsmi ekoloji gün meteoroloqların iqlimin mühafizəsi ilə bağlı çağırışlarından sonra formalaşıb. İqlim insanların rifahına və gələcək nəsillərin həyatına təsir göstərən əsas amillərdən biri hesab olunur.
Hazırda iqlim dəyişikliyi bəşəriyyətin üzləşdiyi ən ciddi qlobal problemlər sırasındadır. Qlobal istiləşmə, ozon qatındakı dəyişikliklər, təbii fəlakətlərin artması və hava şəraitinin qeyri-sabitliyi Yer kürəsində ekoloji vəziyyətin pisləşməsinə səbəb olur. Bu proses ərzaq təhlükəsizliyinə, insanların yaşayışına və təbii resursların qorunmasına mənfi təsir göstərir.
Son onilliklərdə dünyada iqlim dəyişikliklərinin sürətləndiyi müşahidə olunur və demək olar ki, hər il yeni temperatur rekordları qeydə alınır. Alimlər temperatur artımının gələcəkdə hansı nəticələr doğuracağını tam dəqiqliklə proqnozlaşdıra bilməsələr də, mütəxəssislər insanların bu prosesi yavaşlatmaq imkanına malik olduğunu bildirirlər.
Ekoloqların fikrincə, iqlim dəyişikliklərinin əsas səbəblərindən biri atmosferdə istixana qazlarının artmasıdır. Bu məsələ beynəlxalq səviyyədə ilk dəfə 1992-ci ildə Rio-de-Janeyroda keçirilən “Yer Sammiti”ndə geniş müzakirə olunub. Daha sonra BMT-nin İqlim Dəyişmələri üzrə Çərçivə Konvensiyası qəbul edilərək dövlətlər üçün ümumi fəaliyyət prinsipləri müəyyənləşdirilib.
1997-ci ildə Yaponiyanın Kioto şəhərində qəbul edilən Kioto Protokolu isə inkişaf etmiş ölkələrə istixana qazı emissiyalarını azaltmaq öhdəliyi qoyub. Ardınca 2007-ci ildə Balidə keçirilən beynəlxalq konfransda karbon emissiyalarının azaldılması istiqamətində yeni çağırışlar səsləndirilib.
Mütəxəssislər hesab edir ki, iqlimin qorunması üçün hər bir insan gündəlik həyatında kiçik də olsa addımlar ata bilər. Enerjiyə qənaət, avtomobildən daha az istifadə, ağacəkmə aksiyalarına qoşulmaq və yaşıllıqları qorumaq bu istiqamətdə mühüm rol oynayır. Kiçik görünən bu addımlar ümumi şəkildə böyük nəticələr verə bilər.
