Azərbaycanda səma hadisəsi müşahidə olunub. Ötən gün ölkə ərazisinin müxtəlif bölgələrində meteor yağışı izlənilib.
Elpress.az xəbər verir ki, gecə səmasında bir-birinin ardınca parlaq meteorların hərəkəti müşahidə olunub. Hadisə xüsusilə səmanı izləyən və görüntülər çəkən şəxslərin diqqətini cəlb edib.
Müşahidə olunan meteor yağışının Perseid meteor yağışı olduğu bildirilir. Perseidlər yüksək intensivliyi, sürətli hərəkət edən və parlaq meteorları ilə seçilir. Meteorların bir çoxu atmosferə daxil olarkən səmada uzun və parlaq işıq izləri yaradır.
Perseid meteor yağışının radiantı, yəni meteorların səmada gəldiyi istiqamət Persey bürcü ərazisində yerləşdiyi üçün bu hadisə “Perseidlər” adlandırılır.
Qeyd edək ki, meteor yağışları xüsusi avadanlıq olmadan, açıq və işıq çirklənməsinin az olduğu ərazilərdə daha aydın müşahidə edilə bilər.
