Bakı metrosunun “28 May” və “Nizami” stansiyaları arasında inşa edilən iki yeni tuneldə tikinti prosesi davam edir. Tunellərdən birində mürəkkəb geoloji və hidrogeoloji şəraitlə qarşılaşılsa da, işlərin müəyyən olunmuş vaxtda yekunlaşdırılması gözlənilir.
Elpress.az xəbər verir ki, “Bakı Metropoliteni” QSC-nin mətbuat katibi Bəxtiyar Məmmədovun sözlərinə görə, hər birinin uzunluğu 211 metr olan tunellərdə qazıntı işləri qrafikə uyğun aparılır.
Onun bildirdiyinə görə, layihənin tamamlanması üçün 11 ay vaxt ayrılıb. İndiyədək tunellərdən birində 40 metrdən çox, digərində isə 30,5 metr məsafədə qazıntı işləri başa çatdırılıb. Mürəkkəb geoloji şəraitə baxmayaraq, mövcud vəziyyət layihənin nəzərdə tutulan müddətdə tamamlanmasına imkan verir.
Qeyd edək ki, Bakı metrosunun Qırmızı və Yaşıl xətlərinin ayrılması layihəsi çərçivəsində əsas tikinti mərhələsinə avqustun 15-də başlanılıb. Bu səbəbdən “28 May” və “Nizami” stansiyaları arasında qatarların hərəkəti müvəqqəti dayandırılıb.
Məhdudiyyət paytaxtda sərnişinlərin gündəlik gediş-gəlişinə təsir göstərir. Xüsusilə pik saatlarda ictimai nəqliyyatda sıxlıq və əlavə vaxt itkisi yaranır.
