Mənzillər Hövsan Yaşayış Kompleksindən təqdim olunub
Elpress.az xəbər verir ki, Dövlət Suverenliyi Günü ərəfəsində şəhid ailələri və müharibə ilə əlaqədar əlilliyi olan şəxslər üçün növbəti mənzil təqdimatı keçirilib.Əmək və Əhalinin Sosial Müdafiəsi Nazirliyinin təşkilatçılığı ilə keçirilən tədbirdə MİDA-nın Hövsan Yaşayış Kompleksindən 36 mənzil yeni sahiblərinə təqdim olunub. Mənzillərlə bağlı sənədlərin təqdim edilməsi 4 saylı DOST Mərkəzində baş tutub.Tədbirdə əmək və əhalinin sosial müdafiəsi nazirinin müavini Rəşad Mustafayev şəhid ailələri və müharibə əlilliyi olan şəxslərin dövlətin sosial dəstək proqramları ilə əhatə olunduğunu bildirib.Qeyd olunub ki, mənzillə təminat həmin kateqoriyalara göstərilən sosial dəstəyin əsas istiqamətlərindən biridir. Vətən müharibəsindən sonra mənzil təminatı proqramının əhatə dairəsi genişləndirilib və postmüharibə dövründə 7 300-dən çox, ümumilikdə isə 16 mindən artıq mənzil təqdim olunub.Bundan əlavə, şəhid ailələri və müharibə ilə əlaqədar əlilliyi olan şəxslərə verilən müavinət və təqaüdlərin orta hesabla iki dəfədən çox artırıldığı bildirilib. Bu şəxslərin məşğulluğunun təmin edilməsi və reabilitasiya xidmətlərinə çıxışının yaxşılaşdırılması istiqamətində də tədbirlərin davam etdirildiyi qeyd olunub.Yeni mənzillərlə təmin olunan vətəndaşlar dövlət tərəfindən göstərilən sosial dəstəyə görə təşəkkürlərini bildiriblər.
