Azərbaycanda hazırlanmış yeni Dövlət Qulluğu Məcəlləsinin layihəsi dövlət qulluqçularının fəaliyyətinin davam etdirilməsi ilə bağlı mövcud qaydalarda dəyişiklik nəzərdə tutur. Layihədə qulluq fəaliyyətini davam etdirmək üçün növbəti sertifikatın əldə edilməsi məqsədilə yenidən imtahan verilməsi tələbi yer almayıb.
Elpress.az APA-ya istinadən xəbər verir ki, bunu Milli Məclisin Dövlət quruculuğu, inzibati və hərbi qanunvericilik şöbəsinin müdiri Hacı Mirhəşim Seyid açıqlamasında bildirib.
Onun sözlərinə görə, yeni qaydalar çərçivəsində dövlət qulluğuna qəbul zamanı sertifikat tələbi saxlanılır. Lakin artıq dövlət qulluğunda çalışan şəxsin fəaliyyətini davam etdirməsi üçün yenidən sertifikat alması tələb edilməyəcək. Bu şəxslərin fəaliyyəti yeni mexanizm əsasında keçiriləcək qiymətləndirmə ilə müəyyənləşdiriləcək.
Hazırda qüvvədə olan “Dövlət qulluğu haqqında” qanunun 28-1-ci maddəsinə əsasən, dövlət qulluqçusu fəaliyyətini davam etdirmək üçün sertifikatının qüvvədə olduğu müddətin son ilində növbəti sertifikatı əldə etmək məqsədilə imtahanda iştirak etməlidir.
Mövcud qaydalara əsasən, dövlət qulluğuna sertifikat əsasında qəbul olunan şəxs sonradan iki dəfə sertifikat əldə etdikdə isə sonuncu sertifikat müddətsiz hesab olunur. Bundan sonra həmin şəxsin dövlət qulluqçusu kimi fəaliyyətini davam etdirməsi üçün yenidən imtahana cəlb edilməsi nəzərdə tutulmur.
Yeni Məcəllənin layihəsində isə dövlət qulluğunda fəaliyyətin davam etdirilməsi üçün növbəti imtahanın keçirilməsi ilə bağlı müddəa yoxdur.
Qeyd edək ki, Azərbaycanda yeni Dövlət Qulluğu Məcəlləsinin layihəsi hazırlanıb. Sənəd 15 fəsil və 94 maddədən ibarətdir.
Məcəllə qüvvəyə mindikdən sonra dövlət qulluğu sahəsində hazırda tətbiq olunan bir sıra qanunvericilik aktlarının ləğvi nəzərdə tutulur. Bunlar arasında “Dövlət qulluğu haqqında”, dövlət qulluqçularının iş vaxtı, vəzifə maaşlarına yerli əmsallar, xüsusi və təhlükəli iş şəraiti ilə bağlı əlavə əmsallar, etik davranış qaydaları və Dövlət Qulluğunu İdarəetmə Şurasına dair qanunvericilik aktları yer alır.
Dövlət Qulluğu Məcəlləsinin layihəsi Milli Məclisin sentyabrın 30-da keçirilən plenar iclasında ilk oxunuşda qəbul edilib.
