Yol hərəkəti qaydalarının pozulmasına görə tərtib edilən sənədlərin sürücülərə çatdırılması üçün əlavə mexanizm müəyyənləşdirilib. Yeni qayda avtomobillərin qeydiyyatı və texniki baxışı zamanı da tətbiq ediləcək.
Elpress.az xəbər verir ki, bununla bağlı fövqəladə hallar naziri Kəmaləddin Heydərov müvafiq qərar imzalayıb.
Qərara əsasən, inzibati xəta üzrə sənədləri poçt vasitəsilə, şəxsən və ya SMS bildirişi ilə rəsmi qaydada çatdırmaq mümkün olmadıqda, onların nəqliyyat vasitəsinin dövlət qeydiyyatına alınması, qeydiyyat şəhadətnaməsi və dövlət nömrə nişanının verilməsi, eləcə də texniki baxış zamanı təqdim edilməsi nəzərdə tutulur.
Elektron kabinetdə mobil telefon nömrəsi qeydiyyatda olduqda, inzibati xəta haqqında elektron qərar həmin nömrəyə SMS bildirişinin çatdırıldığı vaxt rəsmi təqdim edilmiş hesab olunur. Telefon nömrəsi olmadıqda isə şəxs elektron kabinetdə yerləşdirilən sənədlərlə tanış olduqda və ya qanunvericilikdə nəzərdə tutulan digər təqdimetmə proseduru həyata keçirildikdə müvafiq qaydalar tətbiq edilir. Bu mexanizmlər Azərbaycan Respublikasının İnzibati Xətalar Məcəlləsində də nəzərdə tutulub.
Qeyd edək ki, dəyişiklik cərimələrin məbləğinin artırılması və ya yeni cərimələrin tətbiqi ilə deyil, inzibati xəta üzrə sənədlərin rəsmi şəkildə çatdırılması qaydası ilə bağlıdır. Bu müddəalar əcnəbilərə və vətəndaşlığı olmayan şəxslərə şamil edilmir.
