Qaradağ Rayon İcra Hakimiyyətinin sabiq vəzifəli şəxsləri Nadir Muradov və Qafar Abdullayevin həbs müddəti üç ay azaldılıb. Onların cəza müddəti başa çatdığı üçün təxminən bir həftə sonra azadlığa buraxılmaları gözlənilir.
Elpress.az xəbər verir ki, Bakı Apellyasiya Məhkəməsi hər iki şəxsin şikayətini qismən təmin edərək əvvəlki hökmü dəyişib. Birinci instansiya məhkəməsinin qərarı ilə 1 il 3 ay müddətinə azadlıqdan məhrum edilən sabiq məmurların cəzası 1 ilə endirilib.
Nadir Muradov Qaradağ Rayon İcra Hakimiyyəti başçısının sabiq müavini, Qafar Abdullayev isə qurumun təsərrüfat şöbəsində rəhbər vəzifəni icra edən şəxs olub. Onlar məhkəmənin hökmü ilə vəzifəli şəxsin qərarına qanunsuz təsir etməkdə təqsirli biliniblər.
Hər iki şəxs 2025-ci il oktyabrın 31-dən həbsdədir. Cəza müddətinin hesablanması nəzərə alınmaqla, onların 8 gün sonra azadlığa çıxacağı bildirilir.
Xatırladaq ki, 2025-ci ilin noyabrında Baş prokuror yanında Korrupsiyaya qarşı Mübarizə Baş İdarəsi Qaradağ Rayon İcra Hakimiyyətində əməliyyat keçirib. Baş Prokurorluğun açıqlamasına görə, araşdırma rayon ərazisində torpaq sahələri ilə bağlı sənədləşmə və mülkiyyət hüquqlarının qeydiyyatı müqabilində ayrı-ayrı şəxslərdən rüşvət alınması şübhələri ilə əlaqədar aparılıb. İş üzrə bir neçə vəzifəli şəxs barəsində cinayət işi başlanıb.
