Quba İdman, istirahət, təlim və tədris kompleksində yarım milyon manatdan artıq ziyanla nəticələnən maliyyə pozuntuları araşdırılır. İş üzrə müəssisənin direktoru və mühasibi barəsində həbs qətimkan tədbiri seçilib.
Elpress.az xəbər verir ki, Baş Prokuror yanında Korrupsiyaya qarşı Mübarizə Baş İdarəsinin apardığı araşdırma zamanı “Azəridmanservis” MMC-nin Qubadakı kompleksinin direktoru Rəşid Orucov və mühasib Vidadi Şirinovun qanunazidd əməlləri müəyyən edilib.
Hər iki şəxs mənimsəmə və vəzifə cinayətləri ilə bağlı iş üzrə təqsirləndirilir. Araşdırılan iş üzrə dövlətə və ya digər tərəfə dəymiş ziyanın yarım milyon manatı keçdiyi bildirilir.
Binəqədi Rayon Məhkəməsinin qərarı ilə Rəşid Orucov və Vidadi Şirinov barəsində həbs qətimkan tədbiri seçilib. İş üzrə araşdırmalar davam edir.
