Elpress.az xəbər verir ki, Azərbaycan Milli Elmlər Akademiyasında (AMEA) elmi işçilərin fəaliyyətinin qiymətləndirilməsi sistemində mühüm dəyişikliklərə hazırlıq gedir. Yeni yanaşmaya əsasən, ənənəvi kağız hesabatların mərhələli şəkildə ləğv edilərək bal sisteminin tətbiq edilməsi nəzərdə tutulur.
Bu barədə AMEA-nın Rəyasət Heyətinin iclasında çıxış edən Akademiyanın prezidenti İsa Həbibbəyli məlumat verib.
Onun sözlərinə görə, yeni qiymətləndirmə modelinə tam keçidin 2027-ci ildə həyata keçirilməsi planlaşdırılır. Cari ilin noyabr ayınadək isə sistemin üstünlüklərinin öyrənilməsi, maarifləndirmə işlərinin aparılması, elmi ictimaiyyətlə müzakirələrin təşkili və təkliflərin toplanması nəzərdə tutulur.
İsa Həbibbəyli vurğulayıb ki, bu dəyişikliklə bağlı tələsik qərar qəbul edilməyəcək və yeni modelin cəmiyyət, eləcə də elmi ictimaiyyət üçün tam aydın olması məqsədilə bütün faydalı təkliflər nəzərə alınacaq.
AMEA prezidenti qeyd edib ki, dünya elmi artıq rəqəmsal və elmi-metrik qiymətləndirmə metodlarına üstünlük verir. Bu istiqamətdə postsovet ölkələrinin, o cümlədən Ukrayna və Rusiyanın təcrübəsi, həmçinin Yunanıstan və Polşada tətbiq edilən modellər ətraflı şəkildə araşdırılıb.
Akademikin sözlərinə görə, müxtəlif ölkələrin və elmi müəssisələrin istifadə etdiyi bal sistemləri, qiymətləndirmə meyarları və nominasiyalar təhlil olunur. Beynəlxalq təcrübədə səmərəli hesab edilən mexanizmlərin Azərbaycanda tətbiq ediləcək modelin formalaşdırılmasında istifadə olunması planlaşdırılır.
Qeyd edək ki, yeni sistemin tətbiqi elmi fəaliyyətin daha şəffaf, obyektiv və rəqəmsal meyarlar əsasında qiymətləndirilməsinə imkan yaradacaq.
