Elpress.az xəbər verir ki, Marseldə yoldan keçən bir qadın çimərlik yaxınlığında park edilmiş avtomobildə tək qalan iki yaşlı uşağı xilas edib.
Xarici mətbuatın məlumatına görə, hadisə havanın temperaturunun 40 dərəcəyə çatdığı vaxt baş verib. Qadın birbaşa günəş şüaları altında dayanan avtomobilin içində azyaşlını görərək vəziyyətin təhlükəli olduğunu anlayıb.
Körpənin həyatının təhlükə altında olduğunu düşünən qadın avtomobilin şüşəsini sındıraraq uşağı nəqliyyat vasitəsindən çıxarıb və dərhal təcili yardım əməkdaşlarına məlumat verib.
İlkin araşdırma zamanı məlum olub ki, uşağın valideynləri əşyalarını götürmək üçün növbə ilə çimərlikdən ayrılıblar. Hər biri körpənin digər valideynin yanında olduğunu düşündüyündən azyaşlı bir müddət avtomobildə tək qalıb.
Hadisədən xəbər tutan valideynlər dərhal geri qayıdıblar.
Məlumata görə, iki yaşlı uşaq tibbi müayinədən keçirilməsi üçün xəstəxanaya aparılıb. Həkimlər onun vəziyyətinin qənaətbəxş olduğunu bildiriblər.
Hazırda hüquq-mühafizə orqanları hadisənin bütün təfərrüatlarını araşdırır. Valideynlərdən izahat alınıb, lakin onlara qarşı hər hansı hüquqi tədbirin görülüb-görülməyəcəyi hələ açıqlanmayıb.
