Prezident İlham Əliyevin sərəncamı ilə səhiyyə nazirinin müavini təyin edilən Rüfət Hacıəlibəyov uzun illər rəqəmsal transformasiya və informasiya texnologiyaları sahəsində fəaliyyət göstərib.
Elpress.az xəbər verir ki, Rüfət Hacıəlibəyov 2022-ci ilin iyul ayından Səhiyyə Nazirliyində səhiyyənin rəqəmsallaşdırılması məsələləri üzrə nazir müşaviri kimi çalışıb.
Bu müddətdə ölkənin elektron səhiyyə strategiyasının hazırlanmasına rəhbərlik edib və səhiyyə sisteminin rəqəmsal transformasiyasının əlaqələndirilməsini həyata keçirib.Yeni vəzifəsində onun fəaliyyət istiqamətlərinə innovasiyaların tətbiqi, strateji idarəetmə, səhiyyənin rəqəmsallaşdırılması və tibbi statistika sahələri daxildir. 30 illik peşəkar təcrübəyə malik olan Rüfət Hacıəlibəyov müxtəlif dövrlərdə HP, Microsoft və SAP kimi beynəlxalq informasiya texnologiyaları şirkətlərinin Azərbaycandakı nümayəndəliklərinə rəhbərlik edib.
O, dövlət və özəl sektorda informasiya texnologiyaları strategiyalarının hazırlanması, böhran idarəçiliyi və iri layihələrin icrası sahəsində zəngin təcrübəyə malikdir.Rüfət Hacıəlibəyov, həmçinin KOBİA yanında innovativ startaplar üzrə Ekspert Komissiyasının üzvü kimi fəaliyyət göstərib və 2017-ci ildən Bakı Mühəndislik Universitetinin Himayəçilər Şurasında təmsil olunur.
Azərbaycanın informasiya texnologiyaları sahəsinin inkişafına verdiyi töhfələrə görə o, 2021-ci ildə Prezident İlham Əliyevin sərəncamı ilə “Tərəqqi” medalı ilə təltif edilib.
