Şair Elman Gədikli sosial şəbəkə hesabında “Atam kimi unutmadım” adlı yeni şeirini oxucularla bölüşüb. Şeir şair Əli Hacıya ithaf olunub. Müəllif poetik misralarında sədaqət, dostluq, ehtiram və mənəvi bağlılıq hisslərini səmimi şəkildə ifadə edir.
Elpress.az olaraq şeiri təqdim edirik:
Atam kimi unutmadım
Əli Hacıya
Dərddən uzaq gözün gülsün,
Qışın gülsün, yazın gülsün,
Oğlun gülsün, qızın gülsün,
Mən içimdən gülüm, dağlar!
Gümanım yox unutmağa,
Dönməyəsən daş yumağa,
Nədən bürünübsən ağa?
Quruyaydı dilim, dağlar!
Ziyarətə gələn olsun,
Ayaqlarım yalın olsun,
Dərd-ögeylik yalan olsun,
Mən hər evə gəlim, dağlar.
Nə sərt külək, nə sazağam,
Nədən gözündən uzağam?
Yaxşı hələ üzü ağam,
Qurban hazır, bölüm, dağlar.
Bağışlasın Tanrı məni,
Gülümsəyən görüm səni.
At başından güman-çəni,
Mən də rahat ölüm, dağlar!
