Dünya futbolunun tanınmış simalarından olan Arsen Venger FIFA U-15 Dünya Çempionatı və Festivalında iştirak etmək üçün Bakıya səfər edib.
Elpress.az xəbər verir ki, FIFA-nın qlobal futbol inkişafı üzrə rəhbəri olan fransalı mütəxəssis paytaxtda keçiriləcək yarışın qonaqları arasında yer alacaq.
Venger 1996–2018-ci illərdə İngiltərənin “Arsenal” klubuna rəhbərlik edib. O, hazırda məşqçilik fəaliyyəti ilə məşğul olmasa da, FIFA-da futbolun dünya üzrə inkişafı istiqamətində çalışır.
İlk dəfə təşkil olunan FIFA U-15 Dünya Çempionatı və Festivalının oyunları oktyabrın 24-dən 30-dək Bakıda keçiriləcək. Turnirin konsepsiyasının hazırlanmasında da Vengerin iştirakı olub.
Azərbaycanın U-15 millisi yarışda ilk oyununu oktyabrın 24-də saat 19:30-da Bakı Kristal Zalında Timor-Leste yığmasına qarşı keçirəcək.
