Xəzər rayonunda abadlıq, yaşıllaşdırma və payız-qış mövsümünə hazırlıq işlərinə nəzarətlə bağlı müşavirə keçirilib. Aşkar olunan çatışmazlıqlara görə bəzi qəsəbələrin inzibati ərazi dairələri üzrə nümayəndələrinə intizam tədbirləri tətbiq edilib.
Elpress.az xəbər verir ki, müşavirədə kommunal-təsərrüfat qurumlarının rəhbərləri, qəsəbə nümayəndələri və bələdiyyə sədrləri iştirak ediblər.
Rayon icra hakimiyyətinin başçısı Elşən Salahov küçə və prospektlərdəki nöqsanları, qəzalı tikililərin vəziyyətini, eləcə də rayonun memarlıq görünüşünə təsir edən problemləri müzakirəyə çıxarıb. Aidiyyəti şəxslərə çatışmazlıqların aradan qaldırılması və ərazilərə nəzarətin gücləndirilməsi ilə bağlı tapşırıqlar verilib.
Nəzarətin zəif təşkil olunması və yol verilən nöqsanlara görə Qala və Zirə qəsəbələrinin inzibati ərazi dairələri üzrə nümayəndələrinə töhmət verilib. Buzovna və Türkan qəsəbələrinin nümayəndələrinə isə xəbərdarlıq edilib.
Digər qəsəbə nümayəndələrinə də abadlıq və təmizlik işlərini nəzarətdə saxlamaq, aşkar edilmiş problemləri qısa müddətdə aradan qaldırmaq və oxşar halların təkrarlanmasına yol verməmək tapşırılıb.
